Gaiteiro Antón Davila
Os Favoritos de... Antón Davila
Leva desde os sete anos co fol da gaita baixo o brazo e hoxe en día participa en varias formacións musicais e como músico de sesión na gravación de discos de moitos grupos. Algúns dos que lean este artigo desde centros de emigrantes galegos por Europa e América recoñecerán a Antón Davila (Beluso, 1974) como o profesor que imparte os cursiños de gaita.
Compoñente dos Celtas Cortos, cos que ven de gravar o disco "20 años soplando versos”, Antón Davila é un gaiteiro galego que no seu momento buscou un achegamento máis fondo coa música celta marchando a Dublín en 1997 a aprender sobre a gaita irlandesa. Ata entón a súa formación e actividade estiveran no seu Beluso natal coa Banda de Gaitas Novos Ventos e despois cos grupos Ultreia e Amairxen. Foi en Dublín, baixo a tutela de mestres de gaita como Neillidh Mulligan, Mick O’Briain e Flaithrí Neff onde descubriu a súa conexión celta a través da gaita. Tocando este instrumento participou en numerosos concertos e festivais celtas e coa banda irlandesa The Big Jigs fixo unha xira por Suecia, Dinamarca e Holanda.
Ademais do recente traballo cos Celtas Cortos Antón tamén forma parte das bandas Beladona e Aran. Con esta última ven de sacar un disco, “GalÉire”, co cal afondan na irmandade entre as músicas galega e irlandesa. Xustamente agora Antón Davila está sacando para adiante este disco “no tempo libre que me queda na xira de Celtas, -apunta Antón- aínda que tamén estou gravando para algo importante que non podo revelar, estade atentos ó meu web”.
Parte da actividade de Antón como música tamén esta vencellada ao audiovisual xa que tamén traballa como compositor de bandas sonoras para documentais como “As Terras de Merlín” (TVG), “Muiños Tradicionais en Galicia” e “Amelia de Terra de Montes”. Con outras formacións musicais tamén ten gravado en discos de Los Suaves ou El Sueño de Morfeo entre outros moitos.
Partituras encore Zarapallada.
